Pati RASIN Kan Pèp La mete Guylande MESADIEU ak Antonal MORTIME deyò

241

Partagez cet article

Nan yon dezyèm nòt li rann piblik nan dat 20 sektanm 2020 an, Direksyon Pati RASIN Kan Pèp La anonse oisyèlman li mete deyò Guylande MESADIEU ak tout mari l, Antonal MORTIMÉ pou kòz trayizon ak opòtinis. Nòt la presize Komite Santral Pati a deside mete deyò nan Pati a koup sila paske li konstate Antonal MORTIMÉ ak Guylande MESADIEU anbake nan chimen trayizyon.

LIH Média li nan menm nòt la kote Direksyon RASIN Kan Pèp la souliye pou tout moun chwa Guylande MESADIEU fè, pou li antre nan yon swadizan Konsèy Elektoral Pwovizwa (KEP) rejim PHTK a mete kanpe a, depaman ni ak pozisyon pati a sou konjonkti politik la, ni ak vizyon ideyolojik li jan sa defini nan manifès pati a.

Pati Kan Pèp La yon lòt bò atire atansyon sou Rejim neyodivaiyeris-fachis PHTK ak sipò anbasad peyi enperyalis yo mete kanpe yon Konsèy Elektoral ki pa gen okenn lejitimiite epi dèyè do lalwa ak Konstitisyon peyi a. Pati a fè konnen chwa politik Madan MESADIEU fè a tradui yon pozisyon opòtinis epi ki an menm tan yon trayizon lit mas popilè yo.

Pati Rasin Kan Pèp La souliye pi lwen tou òganizasyon Défenseurs Plus Antonal MORTIMÉ ap dirije a patisipe nan desizyon lawont pou voye Guyrlande MESADIEU al soutni pwojè lanmò PHTK-Jovenel Moise ak Core Group la.

Pati RASIN Kan Pèp la deklare li renouvle angajman li nan batay kont sistèm eksplwatasyon ak esklizyon ki tabli nan peyi a. Kont rejim PHTK a ak plan lanmò rejim sa a ap egzekite. RASIN Kan Pèp La kontinye egzije demisvon Jovenel Moise. Li plede pou yon gouvènman pwovizwa sou baz yon antant laj ant tout fòs patriyotik ak pwogresis nan peyi a. Gouvènman pwovizwa sa a daprè Pati a ap genyen pou misyon kreye kondisyon pou pwosè Petwokaribe a ak tout lòt krim finansye nan peyi a, pwosè seri masak ki fèt nan peyi a, soulaje kondisyon malouk majorite popiiasyon an epi kreye baz pou yon ekonomi ki chita sou pwodiksyon nasyonal, prepare yon eleksyon lib ak lejitim nan peyi a.

Pati Rasin Kan Pèp la fini pou l di : Aba rejim kriminèl sanginè PHTK a ! Aba eleksyon malatchonn! Aba enjerans enperyalis yo nan zafè entèn Ayiti ! Viv lit pou byennèt ak diyite pèp ayisyen an!

Kèk ti kesyon ki ale pi lwen ke koze Pati Rasin Kan Pèp la jodi a men ki toujou pase chak fwa gen demach Pouvwa yo nan sans sa a : Kilè ap gen Pati Politik ki aktif tout bon ak yon lis manm ki soude anba ideyal Pati sa a yo ap defann vre ? Kilè Pati yo ap sispann pran woulib ? Kilè manm yo tou ap sispann pran Woulib ? Kòman Pati yo dwe refè tèt yo pou anpeche mòd reyaksyon sa a yo kay manm enfliyan Pati yo isit ?

Leave Comments